Главное управление по образованию Минского Облисполкома

Учреждение образования
«Марьиногорский государственный ордена «Знак Почета»
аграрно-технический колледж имени В.Е.Лобанка»

Язык сайта
Для слабовидящих
Поделиться

Группа ВКонтакте

Пагавары са мной на мове

Пагавары са мной на мове

У каледжы прайшоў Тыдзень роднай мовы. Гэта традыцыйнае свята, якога чакаюць усе ўдзельнікі адукацыйнага працэсу. Мэта правядзення тыдня – прывіццё павагі да роднай мовы як духоўнага скарбу свайго народа. Выкладчыкі штогод плануюць сваю работу ў межах тэматычнага тыдня і імкнуцца адпавядаць патрабаванням часу, улічваюць не толькі свае магчымасці, але і магчымасці навучэнцаў, праводзячы як новыя мерапрыемствы, так і традыцыйныя.

У гэтым годзе было традыцыйна: не толькі пазнавальна, а і захапляльнана, цікава, весела і па-сучаснаму інтэрактыўна! Выкладчыкі беларускай мовы і літаратуры, іншых прадметаў агульнаадукацыйнага цыклу правялі беларускамоўныя мерапрыемствы: вучэбныя заняткі, выхаваўчыя і інфармацыйныя гадзіны, інтэрактыўныя і інтэгрыраваныя гульні, цікавыя акцыі, арганізавалі прагляд відэаматэрыялу. Праводзячы кожнае мерапрыемства, спадзяваліся, што навучэнцы запомняць трапныя залацінкі-выслоўі роднай мовы, духоўныя запаветы беларускіх песняроў, якія яны пакінулі нашчадкам для таго, каб жыла і квітнела Беларусь, захоўваліся спрадвечныя традыцыі, шанавалася беларуская мова, гучала ў сэрцах роднае слова.

Адкрыццё тыдня роднай мовы — гэта заўсёды нешта яркае і запамінальнае. У гэтым годзе тыдзень пачаўся з афармлення выставы “Сэрцам роднага слова дакраніся”, на якой навучэнцы і выкладчыкі прадставілі цікавыя матэрыялы пра беларускую мову, літаратуру і культуру. Наведвальнікі праз інтэрактыўнае ўзаемадзеянне зразумелі, колькі цікавага і нязведанага можна знайсці ў невычэрпных скарбніцах нашай Радзімы.

У галоўным копусе на працягу тыдня можна было глядзець беларускамоўныя мультфільмы, а ў корпусе агранаміі – ролікі сацыяльнай рэкламы “Смак роднай мовы” і цікавыя відэасюжэты пра знакамітых беларусаў “Натхнёныя Бацькаўшчынай”. Акрамя таго, навучэнцы самі здымалі відэаролікі на тэму “Камплімент на роднай мове”.

Інтэрактыўныя гульні “Моц роднага слова”, “Не маўчы са мной па-беларуску” прайшлі ў кабінеце беларускай мовы і літаратуры для навучэнцаў першага курса. Першакурснікі прынялі ўдзел і ў цікавых віктарынах “Задачкі ад Кірылы” і “Палічы са мной па-беларуску”, якія прапанавала выкладчык матэматыкі Канаш А.Д. Навучэнцы групы 1Т сталі галоўнымі ўдзельнікамі інфармацыйнай гадзіны на тэму “Хімічная прамысловасць Беларусі”, якую падрыхтавала і правяла выкладчык хіміі і біялогіі Базылева Н.А. Сарачынская В.І. правяла беларускамоўныя вучэбныя заняткі па гісторыі Беларусі на тэму “Дзяржаўная ўлада і мясцовае кіраванне ў ВКЛ у ХVІ-ХVІІ стст”.

Пазнавальную гульню “З родным словам круглы год” правяла для навучэнцаў трэцяга курса выкладчык замежнай мовы Бараноўская В.В. Для навучэнцаў выпускнога курса прайшоў займальны   флэш-батл “Хуткамоўкі” і гульня “Мова маёй прафесіі”, арганізатарам якіх стала Смаляк А.А. А выкладчык інфарматыкі Кукіна Н.І. раскрыла таямніцы роднай мовы падчас аднайменнай інфармацыйнай гадзіны.

У мерапрыемствах ахвотна прымалі ўдзел не толькі навучэнцы, але і дарослая аўдыторыя. Так, да акцыі “Далучыся да мудрасці продкаў” далучыліся прадстаўнікі адміністрацыі каледжа і госці з МНС. Інтэгрыраванае мерапрыемства па беларускай мове і фізічнай культуры “Удар галавой” было прапанавана выкладчыкам і працаўнікам каледжа, якія з’яўляюцца аматарамі спорту.

Закончыўся тыдзень роднай мовы акцыяй пажаданняў роднай краіне “Далучы сваю далонь”, у якой прынялі ўдзел усе жадаючыя, нават бацькі навучэнцаў, якія прыехалі на бацькоўскі сход.

Правядзенне тыдняў роднай мовы дазваляе далучыць навучэнцаў да багатай моўнай спадчыны беларускага народа, пашырыць іх лексічны запас. Садзейнічае глыбокаму ўсведамленню таго, што мы — беларусы, у нас ёсць свая мова, непаўторная, мілагучная, якую трэба ведаць і шанаваць, каб пакінуць у спадчыну сваім дзецям.