Сэрцам роднага слова краніся

У перыяд 3-10 лістапада 2025 года ў каледжы прайшоў Тыдзень роднай мовы над назвай “Сэрцам роднага слова краніся”. Гэта традыцыйнае свята, якога чакаюць усе ўдзельнікі адукацыйнага працэсу. Мэта правядзення тыдня – прывіццё павагі да роднай мовы як духоўнага скарбу свайго народа. Выкладчыкі штогод плануюць сваю работу ў межах тэматычнага тыдня і імкнуцца адпавядаць патрабаванням часу, улічваюць не толькі свае магчымасці, але і магчымасці навучэнцаў, праводзячы як новыя мерапрыемствы, так і традыцыйныя.

У гэтым годзе было традыцыйна: не толькі пазнавальна, а і захапляльнана, цікава, весела і па-сучаснаму інтэрактыўна! Выкладчыкі беларускай мовы і літаратуры, іншых прадметаў агульнаадукацыйнага цыклу правялі беларускамоўныя мерапрыемствы: выхаваўчыя і інфармацыйныя гадзіны, інтэрактыўныя гульні, цікавыя акцыі, віртуальныя выставы, віктарыны.

Цікавасць як вучнёўскай, так і дарослай аўдыторыі выклікалі мерапрыемствы “Загадкі ад спадырыні Алены”, “Льецца мова”, “Думкі на хаду”, “Знакамітыя сучаснікі і іх дасягненні”, “Забытыя словы беларускай мовы”, “Лінгвістычныя задачкі”, “З вытокаў роднай мовы”, “Магія беларускай мовы”, “Пісьменнікі-юбіляры 2025”,  “Беларускамоўны плэйліст”, “Мае любімыя беларускія словы”, “Мова – гісторыя, сучаснасць і будучыня”, якія падрыхтавалі і правялі выкладчыкі В.В.Бараноўская, Л.Р.Дзедучэнка,  А.Д.Канаш, Н.І.Кукіна, В.І.Сарачынская, А.В.Свірыдава, Т.І.Чацверыкова.

Мерапрыемствы, якія праводзяцца ў межах Тыдня роднай мовы заўсёды з’яўляюцца яркай і запамінальнай падзеяй. Спадзяёмся, што і ў гэтым навучальным годзе кожны ўдзельнік адкрыў для сябе цікавую старонку ў авалодванні роднай мовай

Экскурсійна-адукацыйная праграма

Удзельнікаў заключнага этапу конкурсу “Беларусь — мая Радзіма”, у ліку якіх былі навучэнец другога курса Гушчын Сяргей і кіраўнік народнага музея гісторыі ўстановы адукацыі Алена Свірыдава, гасцінна сустракалі ў Рэспубліканскім цэнтры экалогіі і краязнаўства ў Мінску. Для навучэнцаў і іх кіраўнікоў была арганізавана экскурсійна-адукацыйная праграма з наведваннем Храма-помніка ў гонар Усіх Святых і мемарыяльнага комплексу “Трасцянец”, дзе адбыўся мітынг з узлажэннем кветак.

Збяры Беларусь у сваім сэрцы

18-19 лістапада 2025 года ў Рэспубліканскім цэнтры экалогіі і краязнаўства адбыўся заключны этап рэспубліканскага конкурсу «Беларусь — мая Радзіма», які праводзіцца ў межах акцыі «Збяры Беларусь у сваім сэрцы». Гэты конкурс прысвечаны 80-годдзю Перамогі савецкага народа ў Вялікай Айчыннай вайне. Спачатку навучэнцы даследвалі мемарыялы, помнікі і магілы, звязаныя з ваеннымі падзеямі, затым складалі экскурсійныя маршруты па малой радзіме, пасля — афармлялі тэматычную брашуру. На наступным этапе трэба было адказаць на пытанні інтэрактыўнай віктарыны па змесце брашур, складзеных навучэнцамі ўсіх раёнаў Мінскай вобласці. Лепшыя знаўцы Міншчыны трапілі на заключны этап. Сярод іх — навучэнец другога курса, які наведвае аб’яднанне па цікавасцях «Старонкі гісторыі», Гушчын Сяргей, якога падрыхтавала кіраўнік народнага музея гісторыі ўстановы адукацыі Свірыдава Алена Валянцінаўна. У складзе каманды Мінскай вобласці падчас выканання заданняў тэарэтычнага і практычнага тураў у фінале ён даказаў, што любіць Радзіму ўсім сэрцам, і атрымаў Дыплом другой ступені Міністэрства адукацыі Рэспублікі Беларусь і Рэспубліканскага цэнтра экалогіі і краязнаўства.