80-годдзе Мінскай вобласці

15 студзеня 2018 года адзначаецца 80-годдзе з дня заснавання Мінскай вобласці. Гісторыя нашай навучальнай установы непарыўна звязана з гісторыяй Пухавіцкага раёна і Мінскай вобласці. Мы былі і застаёмся іх неад’емнай часткай. Пры чым часткай, пра якую вядома далёка за межамі нашай краіны.

У каледжы распрацаваны план мерапрыемстваў, прыўрочаных гэтай знамянальнай даце. Выкананне плана пачалося яшчэ ў канцы мінулага года. Мы мелі магчымасць палюбавацца на выставу творчых работ выкладчыкаў і працаўнікоў каледжа. На вучнёўскай канферэнцыі было прадстаўлена даследванне пра цікавыя факты з паходжання назваў населеных пунктаў Пухавіцкага раёна. Навучэнцы-наведвальнікі аб’яднанняў па цікавасцях “Старонкі гісторыі” і “Мінуўшчына” правялі выхаваўчае мерапрыемства на тэму “Імя Якуба Коласа ў гісторыі УА МДАТК” і распрацавалі экскурсійны маршрут “Пасёлак Мар’іна – маёнтак Л.С.Макава – геаграфічны цэнтр Беларусі”.

8 студзеня навучэнцы групы 61э наведалі Пухавіцкі раённы краязнаўчы музей, дзе прадстаўлена новая экспазіцыя па гісторыі Мінскай вобласці. Экспазіцыя змяшчае кнігі “Памяць” (раёны Мінскай вобласці); фотаздымкі знакамітых людзей Міншчыны, звесткі пра іх дзейнасць і дасягненні; помнікі, размешчаныя ў гарадах Мінскай вобласці і шмат іншай цікавай інфармацыі.

Не абмінулі і залу, прысвечаную жыццю і дзейнасці класіка беларускай літаратуры Якуба Коласа, біяграфія якога цесна звязана з гісторыяй Пухавіцкага раёна.

Экскурсія ў галерэю Пухавіцкага краязнаўчага музея на экспазіцыю “Якуб Колас і Пухавіччына”

Вывучэнне беларускай літаратуры ў каледжы адбываецца на працягу трох семестраў, і для другакурснікаў ужо падыходзіць да завяршэння. У хуткім часе яны развітаюцца са школьнымі дысцыплінамі, аддадуцца вывучэнню дысцыплін па выбранай спецыяльнасці. Выкладчыкам агульнаадукацыйных дысцыплін заўсёды хочацца пабудаваць свае заняткі так, каб не пачуць крыўднае пытанне: “Нашто нам у каледжы мова, літаратура, гісторыя, хімія… Мы прыйшлі за прафесіяй, а школьныя навукі вывучылі ў школе!” Таму і стараюцца выкладчыкі не толькі на занятках, а і па-за іх межамі. Вялікую ўвагу адводзяць пазааўдыторнай і выхаваўчай дзейнасці. Выкладчык беларускай мовы і літаратуры Свірыдава А.В. развітанне з вывучэннем літаратуры ў каледжы арганізавала ў мастацкай галерэі Пухавіцкага краязнаўчага музея. Каб навучэнцы на ўсё жыццё запомнілі, што беларускае слова – неўміручае, а беларуская літаратура – бясконцая, на прыканцы вывучэння беларускай літаратуры навучэнцы груп другога курса наведалі экспазіцыю “Якуб Колас і Пухавіччына”. З вуснаў дырэктара краязнаўчага музея Прановіча А.А. пачулі цікавы аповед пра тое, што звязвала класіка беларускай літаратуры, вядомага ва ўсім свеце, Якуба Коласа з Пухавіцкай зямлёй. У навучэнцаў яшчэ раз з’явілася магчымасць дакрануцца да багатай творчай спадчыны Якуба Коласа. У незвычайнай атмасферы яны зразумелі, што яшчэ шмат чаго засталося непрачытаным, паабяцалі не развітвацца з беларускай літаратурай у той момант, калі з’явяцца выніковыя адзнакі ў залікоўках.