12 сакавіка адбылася сустрэча навучэнцаў першага курса з сучаснымі беларускімі паэтамі Эдуардам Акуліным і Леанідам Дранько-Майсюком. Кожны раз сустрэча паэтаў з нашымі навучэнцамі праходзіць у форме сапраўднага свята – свята прыгожага пісьменства, паэзіі, музыкі, гісторыі. Як добрыя сябры, Эдуард Акулін і Леанід Дранько-Майсюк падзяліліся патаемнымі думкамі: пра каханне і сям’ю, пра адказнасць за свае ўчынкі, пра творчасць. Спадзяёмся, што знайшла водгук у душах першакурснікаў парада Леаніда Васільевіча: “Думай! Заўсёды думай! Збіраешся зрабіць крок наперад – падумай, крок назад – таксама падумай. Можа, якраз у гэты момант трэба проста спыніцца.” А песні ў выкананні Эдуарда Аляксандравіча заўсёды з’яўляюцца прыгожым аздабленнем свята. Прыемна, што навучэнцы ахвотна падпяваюць аўтару. На памяць аб сустрэчы застанецца чарговы нумар часопіса “Верасень”, які набылі навучэнцы для таго, каб пазнаёміцца з цікавымі творамі розных жанараў, а таксама і для таго, каб пасля любавацца на аўтографы, пакінутыя аўтарамі.

04 сакавіка 2020 года навучэнцы групы 119М з выкладчыкам беларускай мовы і літаратуры Свірыдавай А.В. наведалі Дзяржаўны музей гісторыі беларускай літаратуры, дзе пазнаёміліся з развіццём літаратурнага працэсу праз экспанаты пастаяннай экспазіцыі “Беларуская літаратура другой паловы ХХ ст.”. Цікавасць выклікалі аўтографы і асабістыя рэчы беларускіх пісьменнікаў, творы якіх уключаны ў праграму па беларускай літаратуры ў каледжы. Станоўчыя эмоцыі перажылі навучэнцы і каля стэнда, прысвечанага сучасным паэтам, з якімі восенню асабіста пазнаёміліся падчас сустрэчы ў каледжы: Эдуарду Акуліну і Леаніду Дранько-Майсюку. Надведванне музея дае магчымасць сцвердзіць думку, што літаратура – гэта не толькі біяграфіі вялікіх асобаў, але і біяграфіі вялікіх стыляў, культураў і нават цывілізацый.