21 сакавіка адзначаюць Сусветны дзень паэзіі – свята, якое не проста свярджае значэнне літаратуры для культурнага жыцця грамадства, а і аб’ядноўвае паэтаў і дае магчымасць заявіць пра сябе і свой паэтычны талент.

Інфармацыйную гадзіну, прыўрочаную гэтаму святу, правяла ў групе 115М куратар Свірыдава А.В. Навучэнцы пазнаёміліся з гісторыяй з’яўлення свята, узгадалі сустрэчы з сучаснымі беларускімі паэтамі, якія праходзілі ў каледжы, пагарталі зборнікі з аўтографамі беларускіх аўтараў, пачыталі свае любімыя вершы і любімы верш куратара, праслухалі дзівосныя песні на словы беларускіх аўтараў у выкананні ансамбля “Сябры” (https://www.youtube.com/watch?v=TjR0VSMIwi0).

17 сакавіка 2021 года навучэнцы групы 121М з выкладчыкам беларускай мовы і літаратуры, кіраўніком народнага музея гісторыі ўстановы адукацыі Свірыдавай А.В. наведалі ДУК “Пухавіцкі раённы краязнаўчы музей”. Навучэнцы пазнаёміліся з экспазіцыяй “Прырода краю”, праслухалі цікавую экскурсію пра фауну нашага рэгіёна. Не менш захапляльным быў аповед дырэктара музея Прановіча А.А. пра “нараджэнне і бацьку Мар’інай Горкі”. Навучэнцы даведаліся цікавыя факты пра з’яўленне горада, розныя версіі паходжання яго назвы, малавядомыя біяграфічныя звесткі пра Льва Макава, раскрылі таямніцу тапанімічнай загадкі: цяпер яны ведаюць, чаму не супадаюць назвы раёна і яго адміністрацыйнага цэнтра.

10 лютага 2021 года ў сценах Мар’інагорскага дзяржаўнага аграрна-тэхнічнага каледжа адбылася прэзентацыя зборніка вершаў Леаніда Дранько-Майсюка “Скарб”.  Зборнік выдадзены выдавецкім домам “Звязда” ў студзені 2021 года. Яго аўтар – наш добры сябра — Леанід Дранько-Майсюк вырашыў раздзяліць радасць чарговага творчага поспеху з навучэнцамі і выкладчыкамі каледжа.

Скарб – не грошы і не багацце, а тая лірычная каштоўнасць, той канечны жыццёвы шлях, якому заўсёды сугучныя журба і весялосць, лагода і хваляванне, таямнічасць і зразумеласць, рухавасць і супакаенне, устойлівыя вобразы і нязвыклая вершаваная мова. Аб тым, што гэта так і што нязменна, сведчыць новая паэтычная кніга Леаніда Васільевіча. Менавіта гэтую ідэю даносіць  паэт сваім чытачам праз радкі вершаў, сабраных пад назвай “Скарб”.

Таксама былі ўзгаданы і папярэднія выданні аўтара: архіўна-дакументальныя аповесці Леаніда Дранько-Майсюка, багатыя на мастацкія асэнсаванні. Гэта кніга «…Усе бачылі нястачу віна…» пра ксяндза Адама Станкевіча, яго самаахвярную працу на карысць Беларусі, якая пабачыла свет у 2020 годзе. І кніга «…Натуральны, як лінія небасхілу…» пра маладыя гады беларускага паэта  Максіма Танка, яго складане жыццё ў Вільні, якая выйшла ў 2017 годзе.

Навучэнцы ахвотна прымалі ўдзел у інтэрактыўнай гутарцы з паэтам. На памяць яны набылі кнігі Леаніда Дранько-Майсюка, якія аўтар з задавальненнм аздобіў аўтографамі. Магчымасць набыць кнігі была прадстаўлена супрацоўнікамі кніжнай крамы “Акадэмкніга”.