Главное управление по образованию Минского Облисполкома

Учреждение образования
«Марьиногорский государственный ордена «Знак Почета»
аграрно-технический колледж имени В.Е.Лобанка»

Язык сайта
Для слабовидящих
Группа ВКонтакте

Мероприятия цикловых комиссий

Экскурсія ў Дзяржаўны музей гісторыі беларускай літаратуры

04 сакавіка 2020 года навучэнцы групы 119М з выкладчыкам беларускай мовы і літаратуры Свірыдавай А.В. наведалі Дзяржаўны музей гісторыі беларускай літаратуры, дзе пазнаёміліся з развіццём літаратурнага працэсу праз экспанаты пастаяннай экспазіцыі “Беларуская літаратура другой паловы ХХ ст.”. Цікавасць выклікалі аўтографы і асабістыя рэчы беларускіх пісьменнікаў, творы якіх уключаны ў праграму па беларускай літаратуры ў каледжы. Станоўчыя эмоцыі перажылі навучэнцы і каля стэнда, прысвечанага сучасным паэтам, з якімі восенню асабіста пазнаёміліся падчас сустрэчы ў каледжы: Эдуарду Акуліну і Леаніду Дранько-Майсюку. Надведванне музея дае магчымасць сцвердзіць думку, што літаратура – гэта не толькі біяграфіі вялікіх асобаў, але і біяграфіі вялікіх стыляў, культураў і нават цывілізацый.

Экскурсія ў Дзяржаўны музей гісторыі беларускай літаратуры

28 лютага 2020 года навучэнцы групы 68А з выкладчыкам беларускай мовы і літаратуры Свірыдавай А.В. наведалі Дзяржаўны музей гісторыі беларускай літаратуры, дзе пазнаёміліся з экспанатамі пастаяннай экспазіцыі “Беларуская літаратура другой паловы ХХ ст.”. Цікавасць выклікалі аўтографы беларускіх пісьменнікаў, творы якіх уключаны ў праграму па беларускай літаратуры ў каледжы.

Таксама праглядзелі і часовую літаратурна-мастацкую экспазіцыю “Мудрасць вякоў”, якая створана да юбілеяў гуманістаў-асветнікаў: Еўфрасінні Полацкай, Кірылы Тураўскага, Францыска Скарыны, Міколы Гусоўскага, Сымона Буднага, Вясіля Цяпінскага. Тут навучэнцы былі не проста слухачамі, а актыўнымі ўдзельнікамі інтерактыўнай гульні “Адкажы сам”, падчас якой праявілі добрыя веды па гісторыі і літаратуры.

З любоўю да мовы

Дзень роднай мовы, які ва ўсім свеце адзначаюць 21 лютага, — традыцыйнае свята ў нашым каледжы. Яго арганізатарам штогод выступае загадчык кабінетам беларускай мовы і літаратуры Свірыдава А.В.

Як правіла, найбольш актыўнымі ў святкаванні гэтага цудоўнага дня з’яўляюцца выкладчыкі агульнаадукацыйных дысцыплін, але ў гэтым годзе да іх з задавальненнем далучыліся калегі з іншых цыклавых камісій. Былі запланаваны і праведзены не толькі пазнавальныя, але і захапляльныя мерапрыемствы, у якіх прыняла ўдзел болей за 200 навучэнцаў розных курсаў і 18 выкладчыкаў.

У фае галоўнага корпуса, у кабінеце беларускай мовы і літаратуры, на трэцім паверсе корпуса “Агранамія”  наведвальнікі аб’яднанняў па цікавасцях “Старонкі гісторыі” і “Мінуўшчына” аформілі тэматычныя стэнды  і выставы.

Інфармацыйныя гадзіны “Сучасны стан беларускай мовы”,  “Цікавыя факты пра беларускую мову”, “З вытокаў роднай мовы”, “Скарбы роднай мовы”, “Дзень мовы” правялі куратары вучэбных груп Бараноўская В.В., Канаш А.Д., Худзіцкі А.А., Кушняроў В.А., Сарачынская В.І., Кішко Н.А., Аседач А.А., выкладчык беларускай мовы і літаратуры Свірыдава А.В.

Беларускамоўныя хвіліны духоўнасці на занятках правялі выкладчыкі Арэшчанка А.В., Дзедучэнка Л.Р., Сурма Т.В.,  Хлебавец Т.Г. Матывацыя пазнавальнай дзейнасці праз выкарыстанне беларускамоўных сеціва-рэсурсаў на занятках па англійскай мове адбылася дзякуючы выкладчыку Казак Д.М.

На перапынках былі праведзены акцыі пад агульным дэвізам “З любоўю да мовы”:  “Лічбы, лікі і лічэнне” (Канаш А.Д.), “Раслінны свет краіны” (Кушняроў В.А.), “Характарыстыка чалавека” (Свірыдава А.В.), “Талент і напеў роднай зямлі”. Цікавасць выклікалі інтэрактыўныя праекты, дзе для выканання заданняў трэба было выкарыстоўваць звесткі з інтэрнет-крыніц: movananova.by, zviazda.by, adukar.by.

Усе: арганізатары, удзельнікі і наведвальнікі мерапрыемстваў — атрымалі задавальненне ад пануючай прыгажосці роднага слова. Паўтараць вядомае і даведвацца новае пра беларускую мову разам атрымалася на “выдатна”!

Свята ў Дзяржаўным музеі гісторыі беларускай літаратуры

14 лютага – не толькі дзень закаханых. Для аматараў чытання і для ўсіх тых, хто збіраецца імі стаць, у 2012 годзе 14 лютага быў абвешчаны сусветным днём дарэння кніг. Гэта свята, якое заклікае любіць кнігу і спазнаваць свет, чытаючы.

Навучэнцы групы 63Э з выкладчыкам беларускай мовы і літаратуры Свірыдавай А.В. з задавальненнем адгукнуліся на запрашэнне супрацоўнікаў Дзяржаўнага музея гісторыі беларускай літаратуры адзначыць святы разам.

На працягу дня ў музеі быў наладжаны шэраг цікавых мерапрыемстваў — і навучэнцы сталі актыўнымі ўдзельнікамі: яны сустрэліся з сучасным беларускім паэтам-бардам Міхаілам Бараноўскім, пазнаёміліся з яго творчасцю, прынялі ўдзел у аўтограф- і фотасесіі. Акрамя таго, навучэнцы мелі магчымасць павандраваць па музейных залах і пазнаёміцца са зместам пастаяннай экспазіцыі “Беларуская літаратура другой паловы ХХ ст.”. Вывучэнне літаратуры гэтага перыяду якраз зараз адбываецца на занятках па беларускай літаратуры. Навучэнцы не толькі пашырылі свае веды, але і праявілі ўжо набытыя, прыняўшы ўдзел у інтэрактыўнай віктарыне.

Навучэнцы яшчэ доўга будуць успамінаць пра гэты цудоўны дзень, праведзены ў музеі. А каб і супрацоўнікі музея ўспаміналі пра навучэнцаў нашага каледжа, яны падаравалі кнігу Рыгора Грабчыкава пра гісторыю станаўлення і развіцця ўстановы адукацыі — прыйсці ў дзень дарэння кніг у госці без падарунка яны не маглі. Трэба сказаць, што і пайшлі з музея з падарункамі – кнігамі беларускіх аўтараў, якія некалі былі гасцямі нашага каледжа: Анатоля Зэкава і Васіля Жуковіча.

Экскурсія ў музей сучаснай беларускай дзяржаўнасці

11 студзеня 2020 года навучэнцы 117М групы па ініцыятыве выкладчыка Свірыдавай А.В. наведалі музей сучаснай беларускай дзяржаўнасці. Гэта адзін з самых маладых і тэхналагічных музеяў нашай краіны. Ён уваходзіць у структуру Нацыянальнага гістарычнага музея і з’яўляецца важным інфармацыйным, прэзентацыйным і камунікацыйным цэнтрам Беларусі.

Экспазіцыя музея ахоплівае перыяд сучаснай гісторыі Рэспублікі Беларусь і прысвечана палітычнаму, эканамічнаму, навуковаму, культурнаму і спартыўнаму жыццю краіны. Збор музея складае каля 4 000 адзінак захоўвання, 800 з якіх прадстаўлены ў экспазіцыі. Навучэнцы атрымалі магчымасць убачыць і пазнаёміцца з гісторыяй вялікай колькасці ўнікальных прадметаў, якія маюць выключнае гістарычнае значэнне для незалежнай Беларусі. Найбольш прываблівамі аказаліся залы, у якіх адлюстравана  сацыяльна-эканамічнае развіццё Беларусі, у прыватнасці —  дасягненні беларускай сельскай гаспадаркі, а таксама макеты культурных і спартыўных аб’ектаў, алімпійскія ўзнагароды беларускіх спартоўцаў.

Акрамя таго, што навучэнцы пазнаёміліся з экспазіцыяй, яны яшчэ прынялі ўдзел у інтэрактыўнай патрыятычнай імпрэзе, арганізаванай супрацоўнікамі музея. Трэба адзначыць, што хлопцы не падвялі каледж і паказалі бездакорныя веды па гісторыі як суверэннай Беларусі, так і ранейшых перыядаў.